وصفة #001حلويات مصريةأكل بيتي
شعرية باللبن على طريقة بودي
تقيلة لدرجة تتاكل بالشوكة.
Egyptian Vermicelli Pudding
أنا بحب الشعرية باللبن تقيلة، مش سايلة. تكون كريمي والشعرية فيها طرية، بس مش معجنة. عايزها تتاكل بالشوكة أو المعلقة. وعشان كده، مش بمشي فيها بمقادير ثابتة قد ما بمشي بالعين والطعم والقوام.

نعملها إزاي؟
نحمّر الشعرية
بحط كوباية شعرية في حلة على النار، ومعاها معلقة سمنة بلدي أو الكمية اللي أحبها.
أفضل أقلب باستمرار لحد ما الشعرية تاخد لون دهبي.
نبدأ ننزل باللبن
أول ما الشعرية تبقى دهبي، بضيف اللبن بالتدريج.
ينفع اللبن يكون طبيعي أو طويل الأجل.
ومع اللبن، بضيف قشطة وسكر على حسب الرغبة.
التقليب هو الأساس
بفضل أقلب طول الوقت على نار هادية، عشان اللبن ما يلزقش أو يتحرق.
كل ما الخليط يتقل، بزود لبن بالتدريج. وممكن أزود سكر أو قشطة حسب الطعم.
بكرر نفس العملية لحد ما الشعرية تستوي وتبقى طرية، والقوام يبقى تقيل وكريمي.
نوصل للقوام المثالي
الهدف إن الشعرية تكون طرية من غير ما تبقى معجنة.
اللبن لازم يكون تقيل وكريمي، لكن مش ناشف.
أفضل أدوق لحد ما أوصل للطعم اللي يعجبني.
اللمسة الأخيرة
ممكن أحط كام نقطة فانيليا للريحة، لكنها اختيارية.
أقدم الشعرية سخنة أول ما تطلع من على النار، عشان وقتها قوامها بيكون مثالي.
تركات بودي
خلي بالك من أطراف الحلة
وأنت بتقلب الشعرية، لازم تقلب عند أطراف الحلة وقاعها، عشان الشعرية ممكن تلزق هناك وتتحرق من غير ما تاخد بالك.
السكر زاد منك؟
لو السكر زاد جدًا، زود لبن بالتدريج مع التقليب عشان تخفف الحلاوة.
الشعرية جمدت أو عجنت؟
لو القوام بقى ناشف أو ماسك زيادة، زود لبن بالتدريج وفضل قلب لحد ما يفك ويرجع كريمي. لو الشعرية استوت زيادة، اللبن هيفك القوام بس الشعرية نفسها هتفضل طرية زيادة.
التقديم المثالي
قدّم الشعرية سخنة، مباشرة بعد التسوية. وهي بتبرد، قوامها بيتقل أكتر.
تريكة زيادة: طواجن شعرية باللبن
- وزّع الشعرية المستوية في طواجن فخار صغيرة تدخل الفرن.
- حط معلقة قشطة على كل طاجن.
- غطّي الوش بشوية من اللبن الكريمي بتاع الشعرية.
- حط الطواجن تحت شواية الفرن لحد ما الوش ياخد لون دهبي.
- خليك جنب الفرن، القشطة لونها بيتغير بسرعة.

FROM THE STOVE
الوصفة بالفيديو
فيديو تحضير الشعرية هيتضاف هنا لما يبقى متاح.
مش كل حاجة بالمقادير… في حاجات بالمزاج.
كل وصفات بودي

