مش كل الأماكن اللي بنحبها لازم تكون الأحسن. ساعات بنحبها عشان كانت موجودة وإحنا بنكبر.

سيلانترو بالنسبالي مش مجرد كافيه بجيب منه قهوة.

فيه جزء من حبي ليه متعلق بإحساسي إننا شبه بعض. أنا كبرت واتغيّرت، وسيلانترو كمان كبر واتوسع، وفي كل مرحلة تقريبًا من حياتي كنت بلاقيه موجود.

من مركز الرمد للنادي

كبرت ولقيت سيلانترو فاتح جنب مركز الرمد اللي كنت بكشف فيه. وبعدها شوفته في النادي، وحسيت إني اتعلقت بيه أكتر.

ولما بدأت أنزل دروس، اكتشفت إني بحب أقعد في سيلانترو وأذاكر هناك. كان من الأماكن اللي بحب أقضي فيها وقت، حتى قبل ما أبقى مهتم بالقهوة بالشكل اللي أنا عليه دلوقتي.

الجامعة… وقبل حتى ما أعرف أسامي الدكاترة

لما دخلت الأكاديمية العربية للعلوم والتكنولوجيا والنقل البحري، قبل ما أعرف أسامي المعيدين والدكاترة كنت عرفت إن سيلانترو فتح تلات فروع جنب الجامعة.

ومن ساعتها، بقى فيه مشروب ثابت في يومي: الأيسد لاتيه.

كل يوم تقريبًا، لمدة أربع سنين، كنت بروح أطلب نفس المشروب. عارف أنا عايز إيه، وعارف المكان اللي هروحه.

لكن حكاية سيلانترو عندي عمرها ما كانت عن القهوة لوحدها.

الميدتيرم والفاينلز… وأول كل حاجة

سيلانترو استضافنا في ليالي الميدتيرم الطويلة وتقلبات الفاينلز. في أيام كنا بنذاكر فيها بالساعات، وفي أيام كنا محتاجين نقعد ونتكلم ونفصل شوية.

وكان موجود في ذكريات تانية بعيد عن المحاضرات: أول انترفيو، وأول ديت، وأول حاجات كتير.

فيه أماكن ممكن تنساها لما تخلص منها وتمشي. وفيه أماكن بتفضل مرتبطة بمرحلة كاملة من حياتك، بالناس اللي كانوا معاك، وبنسخة قديمة منك.

سيلانترو بالنسبالي من النوع التاني.

مش لازم تكون أحسن قهوة في الدنيا

ممكن ألاقي مكان بيعمل قهوة أحسن، وممكن أقعد في كافيه أجمل، بس ده مش بالضرورة يغيّر حبي لسيلانترو.

يمكن عشان الناس هناك بشوشة، ويمكن عشان الجودة اللي قدرت أعتمد عليها لسنين. ويمكن، والأهم، عشان كل ما بدخله بحس إني داخل مكان عارفه وعارفني.

أنا مش بكتب ده عشان أقول إنه أحسن كافيه في مصر. أنا بحكي ليه المكان ده بالذات ليه معنى عندي.

سيلانترو كان جزء من حياتي وأنا بكبر، من أول الدروس لحد سنين الجامعة، من ليالي المذاكرة للحظات اللي بنفتكرها بعد سنين.

سيلانترو كان بيتنا التاني، ومفيش أحلى من البيتي.